Müqəddəs Məşhəddə İraqın qəbilə şeyxləri qarşılandı, Ayətullah Seyid Müctəba Xameneinin xoş gəlmisiniz mesajı çatdırıldı

Mərasimin əvvəlində Qurani-Kərim tilavət olundu, İraq və İran İslam respublikalarının dövlət himnləri səsləndirildi və İmam Rzanın (əleyhissəlam) xüsusi salavatı oxundu. Mərasimdə İslam İnqilabı Rəhbərinin ofisinin beynəlxalq əlaqələr üzrə müavini Höccətül-İslam vəl-müslimin Qumi, İmam Rza hərəminin rəhbərinin müavini Mustafa Feyzi, Xübrəqan Məclisinin üzvü Höccətül-İslam Şeyx Abbas Kəbi və bir sıra digər ölkə rəsmiləri iştirak edirdilər.

Mərasimin əvvəlində Höccətül-İslam Qumi iraqlı qonaqları salamlayaraq onların iştirakına görə təşəkkür etdi və İslam İnqilabının Rəhbəri Ayətullah Seyid Müctəba Xameneinin İraqın qəbilə başçılarına və şeyxlərinə ünvanladığı xoş gəlmisiniz mesajını onlara çatdırdı.

O, İran və İraq xalqları arasındakı dərin əlaqələrə də toxunaraq İraq qəbilələrinin və xalqının rolunu, eləcə də mücahid şəhid İmam Ayətullah Seyid Əli Xameneinin dəfn mərasimində göstərdikləri möhtəşəm qonaqpərvərliyi yüksək qiymətləndirdi.

Daha sonra Xübrəqan Məclisinin üzvü Höccətül-İslam Şeyx Abbas Kəbi də İran və İraq xalqları arasındakı möhkəm əlaqələrə toxunaraq şəhid İmamın dəfn mərasiminin təşkilində göstərdikləri xidmətlərə görə İraq qəbilələrinə və böyük şəxsiyyətlərinə təşəkkür etdi.

Qarşılama mərasiminin başqa bir hissəsində Xuzistan qəbilələrinin şeyxlərindən biri qonaqları salamlayaraq İraq nümayəndə heyətinə təşəkkürünü bildirdi. Bunun müqabilində İraq qəbilə şeyxlərinin nümayəndələrindən biri də göstərilən qarşılanmaya görə minnətdarlığını ifadə etdi.

Mərasimin sonunda İraq qəbilələrinin nüfuzlu şəxsləri və nümayəndələri arasından tanınmış hörmətli bir şəxsiyyət şəhid Rəhbərin, eləcə də Ayətullah Seyid Müctəba Xameneinin və İran xalqının müqavimətinin vəsf olunduğu bir şeir oxudu.